អន្តរជាតិ៖ ប្រធានាធិបតីអាមេរិកលោក ចូ បៃឌិន និងប្រធានាធិបតីចិនលោក ស៊ី ជីនពីង បានជួបពិភាក្សាគ្នាតាមទូរស័ព្ទ ដើម្បីបញ្ជៀសនូវជម្លោះណាមួយ ក្នុងពេលដែលទំនាក់ទំនងមួយរយៈចុងក្រោយនេះកាន់តែក្ដៅ។

យោងតាមសេចក្ដីប្រកាសព័ត៌មានរបស់សេតវិមានប្រធានាធិបតីអាមេរិក ឱ្យដឹងថា ការជួបជជែកគ្នាតាមទូរស័ព្ទជាង៩០នាទីរវាង មេដឹកនាំប្រទេសទាំងពីរគឺបានពិភាក្សាលើយុទ្ធសាស្ត្រទូលំទូលាយ រួមទាំងផលប្រយោជន៍ និងជម្លោះដែលប្រទេសពីផ្ទុយគ្នា ទាក់ទងនឹងសេដ្ឋកិច្ច ការបំរ៉ែបំរួលអាកាសធាតុ បញ្ហានៃជំងឺរាតត្បាតកូវីត-១៩ ជាពិសេសគឺបញ្ហាជម្លោះនៅតំបន់ឥណ្ឌូប៉ាស៊ីហ្វិក។

សេចក្តីថ្លែងការណ៍បានលើកឡើងថា៖ « ប្រធានាធិបតីបៃដិនបានគូសបញ្ជាក់ពីការចាប់អារម្មណ៍ឥតឈប់ឈរ របស់សហរដ្ឋអាមេរិកចំពោះសន្តិភាព ស្ថិរភាព និងវិបុលភាពនៅក្នុងតំបន់ឥណ្ឌូ-ប៉ាស៊ីហ្វិក និងពិភពលោក ហើយមេដឹកនាំទាំងពីរបានពិភាក្សាគ្នាអំពីទំនួលខុសត្រូវរបស់ប្រទេសទាំងពីរដើម្បីធានាថាការប្រកួតប្រជែងគ្នាមិនឈានទៅរកជម្លោះឡើយ » ។

ទោះជាយ៉ាងណាប្រព័ន្ធផ្សព្វផ្សាយចិន បានឱ្យដឹងថាក្នុងកិច្ចសន្ទនានេះ លោក ស៊ី ជីនពិន និយាយដោយត្រង់ៗថាបញ្ហាលំបាកនៃទំនាក់ទំនងរវាងប្រទេសទាំងពីរគឺមកពីគោលនយោបាយដ៏តឹងរឹងរបស់អាមេរិកចំពោះចិនតែម្ដង។

ការជួបពិភាក្សាតាមទូរស័ព្ទនេះគឺជាការជួបពិភាក្សាគ្នាលើកទី២ហើយបន្ទាប់ពីលោក ចូ បៃឌិន ឡើងកាន់ដំណែងជាប្រធានាធិបតីអាមេរិក។ ក្នុងអំឡុងពេលនៃការហៅទូរស័ព្ទដំបូងកាលពី ៧ខែមុនលោកបៃឌិនបានដាក់លក្ខខន្តក្នុងការជែកតែចិនបានបដិសេធ។

ក្នុងរដ្ឋបាលថ្មីរបស់លោក បៃឌិន បានបង្ហាញនូវសញ្ញាប្រកាន់យកវិធីសាស្ត្រដ៏តឹងរឹងចំពោះប្រទេសចិន ស្រដៀងគ្នាទៅនឹងអតីតប្រធានាធិបតីអាមេរិកលោក ដូណាល់ត្រាំ ដែលនេះមិនមែនជាអ្វីដែលចិនពេញចិត្តនោះទេ៕